परमेश्वरले तपाईंलाई निनवेमा चाहनुहुन्छ  (God Wants You in Nineveh!)

Jonah 1-4 (योना १-४)

के तपाईंले योनाको कथा पढ्नुभएको छ? यो कथा सम्पूर्ण बाइबलमा प्रख्यात छ? सन्डे स्कूलका नानीबाहरूले झन एक जना मानिसलाई माछाले निलेको अनि तीन दिनसम्म माछाको पेटभित्र बसेको कथा सुन्दा झन आँखा ठूलो पारेर अचम्म मानेर सुन्छन?

सुरुमै म योनाको पुस्तकको बारेमा दुई बुँदाहरू राख्न चाहन्छु:

1.      यो एक सत्य कथा हो कुनै काल्पनिक घटना होइन। यो कथा गम्भीर, ऐतिहासिक सत्यतालाई देखाउन बाइबलमा प्रस्तुत गरिएको छ। अर्थात्, त्यहाँ योना नाम गरेको एक जना मानिस थिए, जो तर्शीशमा भागेका थिए, जसलाई एउटा ठूलो माछाले निल्यो, जो माछाको पेटमा तीन दिनसम्म बसे, र जसलाई पछि सुख्खा जमिनमा माछाले उकेलिदियो। यो सबै सत्य हो, जसरी यो लेखिएको थियो - मिथक वा किंवदन्ती वा गाथा वा दन्त्यकथा वा दृष्टान्त होइन। योनाको कथा एक सत्य कथा हो।

2.      यो एक रमाइलो कथा हो। म स्वीकार गर्छु कि यो कथा मलाई बाइबलभरि नै सबैभन्दा रमाइलो लाग्छ। यसलाई पढेर हाँस्न गाह्रो छैन। लेखकले यो पुस्तक लेख्दा सायद हामीलाई हसाउन चाहनुभएको थियो, हामी त्यही गरिरहेका छौं भन्ने कुरामा शंका छैन। हामीले यो पुस्तक पढ्दा हाँस्नुपर्छ किनभने हाम्रो हाँसोको अर्थ हामीले अर्थ बुझिरहेका छौं।

हामी सबैमा थोरै मात्रामा भएपनि योनाको चरित्र छ।

हामीमध्ये धेरै जनाले कुनै न कुनै समयमा तर्शीशको यात्राको लागि जहाज लिएका छौं र परमेश्वरबाट भागेका छौ। हामी सबैलाई थाहा छ कि अर्को बाटोमा दौडनुको अर्थ के हो। र हामीलाई थाहा छ कि जब प्रभु हामीलाई हामी हुनुपर्ने ठाउँमा पठाउन चाहनुहुन्छ। हामी भागेपनि त्यहाँ फिर्ता ल्याउन चाहनुहुन्छ तब उहाँ कति रचनात्मक हुनुहुन्छ।

यो पुस्तक वास्तवमा तीन फरक कुराहरूको बारेमा कथा छ। एउटा भाग योनाको बारेमा छ। एउटा भाग निनवेको बारेमा छ। ठूलो भाग परमेश्वरको बारेमा छ। हामी अरू कुनै कुरा भन्दा उहाँको बारेमा बढी सिक्छौं। जब तपाईंले पुरै पुस्तक पढ्नुहुन्छ, तपाईंले पत्ता लगाउनुहुन्छ कि त्यसैले यो पुस्तक किन महत्त्वपूर्ण छ- हामीलाई परमेश्वरको बारेमा सिकाउन। यदि आज बिहान हामी सँगै पढ्दै हाँस्यौं भनेपनि, केही फरक पर्दैन, त्यो राम्रो हुनेछ। यदि हामीले आफूलाई ख्रीष्टको प्रकाशमा राख्छौ भने, त्यो राम्रो हुन्छ। तर यदि हामीले परमेश्वरको बारेमा केही सिक्यौं भने, त्यो सबैभन्दा राम्रो हुनेछ।

यहाँ एउटा सानो रूपरेखा छ जसले बाईबलमा कथा व्यवस्थित गर्न मद्दत गरेको छ। योनाको कथा चार भागमा विभाजित छ, प्रत्येक अध्यायमा फरक फरक घटना छन्:

अध्याय १: योना परमप्रभुबाट भागेका छन्।

अध्याय २: योनाको प्रार्थना छ।

अध्याय ३: योना निनवेमा गएका छन्।

अध्याय ४: परमेश्वरको दयामा योनाले रिस देखाएका छन्।

अध्याय १ मा योना परमेश्वरबाट भागिरहेका छन्; अध्याय २ मा उनी परमेश्वरलाई प्रार्थना गरिरहेका छन्; अध्याय ३ मा उनी निनवेमा परमेश्वरको लागि बोलिरहेका छन्; अध्याय ४ मा उनी परमेश्वरको बारेमा सिकिरहेका छन्।

I. कथा

हामीमध्ये धेरैजसोलाई यो कथा थाहा छ, तर हामी संक्षेपमा हेर्नेछौ:

क. निनवे एक दुष्ट शहर थियो। (योना 1:1-2)

कथा यसरी सुरु हुन्छ: 'परमप्रभुको यो वचन अमित्तैका छोरा योनाकहाँ आयो: ' “त्‍यस ठूलो सहर निनवेमा जा, र त्‍यसको विरुद्धमा प्रचार गर्, किनभने त्‍यसको दुष्‍ट्याइँ मेरो सामु आएको छ”। (योना 1:1-2)

निनवे अश्शूरको राजधानी थियो र अश्शूर इस्राएलको नश्वर/ Mortal (पहिले दखिको) शत्रु थियो। जब परमेश्वरले निनवेलाई दुष्ट भन्नुभयो, उहाँले मजाक गरिरहनुभएको थिएन। तिनीहरूको क्रूरता यति प्रख्यात थियो जुन हामीलाई बुझ्न गाह्रो हुनसक्छ। तिनीहरू एकदन घोर र घिनलाग्दो प्रकारको क्रूर थिए। जब तिनीहरूका सेनाहरूले कुनै शहर वा देश कब्जा गर्थे, कब्जा गरेका मानिसहरुसँग हेर्नै नसकिने क्रूर व्यहारहरु गर्थे। मानिसहरूको जिउँदै छाला निकाल्ने, शिर काट्ने, अंगभंग गर्ने, जिब्रो निकाल्ने, मानव टाउकोको पिरामिड बनाउने, डोरीले चिउँडो छेड्ने र कैदीहरूलाई कुकुर जस्तै ककुरलाई झै बस्न बाध्य पार्ने जस्ता कुराहरू गर्थे भनेर अश्शुरको इतिहासमा लेखिएको पाइन्छ। अश्शूरका प्राचीन अभिलेखहरूले  बताउछ कि यस प्रकारको क्रूरतालाई उनीहरु साहस र शक्तिको ब्याजको रूपमा लिन्थे र गर्व गर्थे। मलाई लाग्छ, तिनीहरूलाई त्यस समयको नाजीहरू (कट्टरवादी, निर्दयी/ हिटलर जस्तो) भन्नु सही हुन्छ होला ।सबैजना अश्शूरीहरूसँग डराउँथे र घृणा गर्थे।

ख. योनाले पनि निनवेलाई घृणा गर्थे।

परमेश्वरले योनालाई निनवेमा प्रचार गर्न बोलाउँदा उनले सायद त्यस्तै महसुस भयो। उनी निनवेसँग अलिकति पनि सम्बन्ध राख्न चाहँदैनथे। उनी इस्राएलका अगमवक्ता थिए; पतित अश्शूरीहरूको बीच प्रचार गर्न चाहेनन्।।

उनलाई परमेश्वरले भन्नुभएको कुरा गर्न अलिकति पनि इच्छा लागेन।

ग. योना अर्को बाटो भागे। (योना 1:3)

'तर योना परमप्रभुबाट भागे र तर्शीशतिर लागे। तिनी तल योप्‍पा सहर गए, र त्‍यहाँ तिनले तर्शीशमा जाने एउटा जहाज भेट्टाए। परमप्रभुबाट भाग्‍न तर्शीश जानलाई जहाजमा भाड़ा दिएर तिनी चढ़े। '

योना 1:3

त्यसैले बाइबलले बताउछ कि योना परमप्रभुको उपस्थितिबाट भागे। हामीलाई यसको अर्थ के हो भनेर ठ्याक्कै थाहा छैन। किन चाहिँ योना भागे? सायद उनले सोचेका थिए कि परमेश्वरको उपस्थिति रेडियो सिग्नल जस्तै छ - तपाईं टावरबाट जति टाढा जानुहुन्छ, सिग्नल(Signal) त्यति नै कमजोर हुन्छ। यदि उनले त्यही सोचेका थिए भने, उनी परमेश्वरबाट जति टाढा भागे, "संकेत" (सिग्नल/Signal) अथवा परमेश्वरको नजर त्यति नै कमजोर हुन्छ भन्ने सोचे कि। कसलाई थाहा छ? सायद उनले सोचे कि यदि उनी धेरै टाढा दौडे भने प्रभुले उनलाई ट्रयाक गर्नुहुनेछैन र उनको ठाउँमा अरू कसैलाई पठाउनु हुनेछ।

सायद त्यसैले योनाले जहाजमा आराम गर्ने निर्णय गरे र आरामसँग सुते। उनी योप्पाको समुद्री बन्दरगाह{जहाजले सामान ल्याउने र लैजाने ठाउँ} (आधुनिक तेल अवीव सहर नजिक) गए र तर्शीश जाने जहाज भेट्टाए। अब निनवे लगभग ६०० माइल पूर्वमा थियो—टाइग्रिस नदीको किनारमा। तर्शीश सम्भवतः स्पेनको तटमा थियो—पश्चिममा लगभग १६०० माइल। योना जति सक्दो छिटो जाँदै थिए।

खैर, योनाले आफूले चाहेको ठाउँमा जाने जहाज भेट्टाए भन्ने कुरा रोचक छैन र? जब हामी आज्ञापालन गर्न चाहँदैनौं, हामी सधैं तर्शीश जाने जहाज भेट्टाउन सक्छौं यसको मतलब बहाना बनाउने उपाय भेट्टाउन सक्छौ। शैतानले हामीलाई परमेश्वरबाट टाढा लैजान हरेक घण्टा, दिनको २४ घण्टा, वर्षको ३६५ दिन तर्शीशको लागि यात्रा गराउन आफ्नो जहाज तयार गरेर राखिरहेको हुन्छ।

जब पनि परमप्रभुको वचन हामीकहाँ आउँछ, शैतानले कारण सोध्न उक्साउछ। किन जाने? कहाँ जाने? कसको लागि जाने? नगए पनि हुदैन। धेरैपटक संगति आउने कुरामा पनि यस्तो हुन सक्छ।

परमेश्वरले भन्नुभएको कुरालाई तपाईं के गर्नुहुन्छ? के तपाईं अर्को बाटो दौडनुहुन्छ?

यदि तपाईंले दौडने निर्णय गर्नुभयो भने, तपाईंले सम्भवतः आफ्नो बाटोमा परमेश्वरबाट टाढा जाने जहाज भेट्टाउनुहुनेछ। किनकि शैतानले तयार पारिराखेको हुन्छ।

योना पनि तर्शीश जाने डुङ्गामा पुग्छन्। यात्रा सुरु हुँदा, उनी केवल एक यात्री जस्तो देखिन्छन्। अरू कसैबाट उसलाई छुट्याउन केही छैन। जबसम्म उनले केही भनेनन्। हामी पनि परमेश्वरबाट भाग्दै गर्दा कसैले थाहा पाउदैनन्। न त पास्टरले न त अगुवाहरूले। धेरैपटक हाम्रो मानिसहरुको आज्ञाकारीता पनि मानिसहरुको अगाडि मात्र ठिक्क पार्ने किसिमको हुन्छ। भ्रामक हुनसक्छ। भित्र - भित्रै परमेश्वरबाट भागिरहेका हुनसक्छौ। सबै चीजहरू सधैं त्यस्तै हुँदैनन् जस्तो देखिन्छन्। हामी वास्तवमा परमेश्वरबाट भागिरहेका बेला तर्शीशको नियमित यात्रामा रहेको जस्तो देखिन सक्छौं। मानिसहरुको ठिक देखिन सक्छौ।

अब योना तल्लो तलामा सुतिरहेको बेला ठूलो आँधी आउँछ। को जिम्मेवार छ? भनेर हेर्न नाविकहरूले चिठ्ठा हाल्छन्, र चिठ्ठा योनाको नाममा पर्छ। उनले उनीहरूलाई उनलाई पानीमा फ्याँक्न भन्छन् र सबै कुरा शान्त हुनेछ भनी भन्छन्। तिनीहरूले  उनले भने अनुसार गर्छन् र समुन्द्र शान्त हुन्छ। र अनिच्छुक अगमवक्ता योनाले जहाज तर्शीशको लागि प्रस्थान गर्दा भूमध्यसागरको पानीमा फ्याकिन्छन्।

योनालाई बोलाउनुहुने परमेश्वरले प्रकृतिको शक्तिहरूलाई प्रयोग गरेर आफ्नो भागेको अगमवक्तालाई पाठ सिकाउन आदेश दिनुहुन्छ। कि परमेश्वरको उपस्थितिबाट भाग्न सकिँदैन।

घ. परमेश्वरले योनालाई भेट्टाउनुभयो र उसलाई फर्काउनुभयो। (योना १:१७)

अब योना समुद्रको बीचमा माछाको पेटमा खेलिरहेका छन्। तर यो योनाले आशा गरेको जस्तो थिएन। बाइबलले यसलाई यसरी भन्छ: "तर परमप्रभुले योनालाई निल्न एउटा ठूलो माछा प्रदान गर्नुभयो, र योना तीन दिन र तीन रात माछाको पेटभित्र रहे।" (योना १:१७)

तपाईंलाई लाग्दैन यो कस्तो प्रकारको माछा थियो होला? हामीले ह्वेलको बारेमा त सुनेका छौं। संसारको सबैभन्दा ठूलो माछाको प्रजाति भित्र Blue whale पर्छ। सायद त्यहाँ भनिएको ठूलो माछा Whale हुन सक्छ। ह्वेलका केही प्रजातिहरूमा मानिसलाई निल्न पर्याप्त ठूला मुख हुन्छ। यहाँ प्रयोग गरिएको हिब्रू वाक्यांशको अर्थ "ठूलो माछा" हो। यस अवसरको लागि परमेश्वरले विशेष रूपमा तयार पार्नुभएको  हुनसक्छ।

यस बिन्दुमा योना माछाको पेटमा छ। तर उसले त्यही पाउँदैछ जुनकुरा उसले पाउन योग्य थियो।

परमेश्वरबाट भाग्नु खतरनाक कुरा हो। परमेश्वरबाट भाग्नु भनेको कम्मरमा डोरी बाधेर टाढा भाग्नु जस्तो हो।

योनाले कठिन तरिकाले पाठ सिकिरहेको छ।

के तपाईं कल्पना गर्न सक्नुहुन्छ कि त्यो माछाको पेटभित्र कस्तो थियो होला? पक्कै अँध्यारो थियो होला, योनाले पक्कै हिँडडुल गर्न सकेन होला, माछा निरन्तर पौडी खेलिरहेको छ, माछाले पानी पिउदा योना नुहाइरहेको छ, समुद्री माछाका अहाराहरुले योनाको शरीर वरिपरि बेरिएको छ, नचिनेको वस्तुहरू योनाको शरिरमा ठोक्किएको छ। अर्को कुरा। माछाको भित्री भाग खाना पचाउने भाग पक्कै गन्हायो होला।

माछाले निल्नुको एउटा सकारात्मक पक्ष छ। यसले योनालाई आफ्नो लागि प्रशस्त समय दिन्छ। अचानक योनाले आफू कसरी यस्तो कठिन अवस्थामा पुगे भन्ने कुरामा विचार गर्न थाल्यो। यस विषयमा सोच्दै जाँदा, योनाले परमेश्वरलाई प्रार्थना गर्न थाल्छन्। उनको प्रार्थनामा अध्याय २ को सबै भाग समावेश छ। सारमा उनी भन्छन्, "प्रभु, मैले मेरो पाठ सिकेको छु। मैले तपाईंको आज्ञापालन गर्ने वाचा गरेको छु, र यदि म यो माछाबाट बाहिर निस्किएँ भने, म त्यही गर्नेछु।"

त्यो पाठ सिकेपछि, अब माछा भित्र बस्नुको कुनै अर्थ छैन। त्यसपछि के भयो भनेर बाइबलले हामीलाई बताउँछ: “अनि परमप्रभुले माछालाई आज्ञा गर्नुभयो, र त्यसले योनालाई सुख्खा जमिनमा उकेलिदियो।” (योना २:१०) मलाई लाग्दैन कि त्यो रमाइलो अनुभव थियो। माछाको पेटमा हुनु भन्दा नराम्रो अरु के हुनसक्छ।

ङ. योनाले सुरुमा परमेश्वरले चाहनुभएको काम गरे। (योना 3:1-3)

1तब परमप्रभुको वचन दोस्रो पल्‍ट योनाकहाँ आयो: 2“त्‍यस ठूलो सहर निनवेमा जा, र म जे समाचार तँलाई दिन्‍छु, सो त्‍यहाँ घोषणा गर्‌।”3योनाले परमप्रभुको वचन पालन गरेर निनवेमा गए। अब निनवे एक अत्‍यन्‍तै प्रख्‍यात सहर थियो। त्‍यो हेर्नलाई तीन दिन लाग्‍दथ्‍यो। (योना 3:1-3)

अब योना यहाँ समुद्र तटमा छन्। के तपाईं कल्पना गर्न सक्नुहुन्छ कि उनी कस्तो देखिन्थे होला? धेरैजसो मानिसहरू सोच्छन् कि उनको छाला पेटको एसिडबाट सेतो भएको थियो होला। उनको लुगा च्यातिएको थियो होला र उनको घाँटीमा समुद्री लेउहरु झुण्डिएको छ। उनी भयानक देखिन्छन्, तर अन्ततः उनी निनवे जान तयार छन्।

परमेश्वरले अब योनालाई फेरि भन्नुहुन्छ, “परमप्रभुको वचन दोस्रो पटक योनाकहाँ आयो: ‘निनवेको ठूलो शहरमा जा र मैले तिमीलाई दिएको सन्देश त्यहाँ घोषणा गर।’” ती शब्दहरूमा अनुग्रह र चेतावनी दुवै छ। अनुग्रह किनभने परमप्रभुको वचन दोस्रो पटक आउँछ फेरि परमेश्वरले योनालाई मौका दिनुभएको छ; चेतावनी किनभने योनाको ढिलाइले परमेश्वरको इच्छा परिवर्तन भएको छैन। कहिलेकाहीं हामी सोच्दछौं कि हामी परमेश्वरलाई उहाँको योजनाहरू परिवर्तन गर्न लगाउन सक्छौं। यदि योनाले त्यस्तो सोचेका थिए भने, उनी गलत थिए।

च. निनवेले इतिहासको सबैभन्दा ठूलो पुनरुत्थानको अनुभव गर्दछ। (योना 3:4)

अब, उनी निनवे जान्छन् र सन्देश प्रचार गर्छन्: "... चालीस दिनपछि निनवे नाश हुनेछ।"।" 'पहिलो दिन योना सहरभित्र पसे। तिनले यसो भनेर घोषणा गरे, “अबको चालीस दिनमा निनवे नष्‍ट हुनेछ” (योना ३:४) यो सकारात्मक दृष्टिकोण होइन। योना सोचमा थिए कि यस्तो नकारात्मक सन्देशले मूर्तिपूजक निनवेवासीहरूको हृदयमा डर जाग्ने आशा गर्दैनन्। तर यो हुन्छ। परमेश्वरले स्पष्ट रूपमा तिनीहरूको हृदय तयार गर्नुभएको थियो ताकि एक पटक योनाले प्रचार गर्न थालेपछि, सम्पूर्ण शहरले पश्चात्ताप गर्छ।

सम्पूर्ण शहर - सायद ६,००,००० मानिसहरूलाई राजादेखि तलसम्म - सम्पूर्ण शहरले पश्चात्ताप गर्छ र परमेश्वरतिर फर्कन्छ।

फलस्वरूप - र यो बुँदा महत्त्वपूर्ण छ - परमेश्वरले तिनीहरूको साँचो पश्चात्ताप देख्नुहुन्छ र तिनीहरूमाथि पठाउने योजना बनाउनुभएको सजाय रद्द गर्नुहुन्छ।

इतिहासकारहरूले हामीलाई बताउँछन् कि यो संसारको इतिहासमा सबैभन्दा ठूलो एकल पुर्नस्थापना हो।

सम्पूर्ण क्षेत्र मूर्तिपूजकताबाट इस्राएलको परमेश्वरको उपासनामा परिणत भएको छ। त्यसबेलादेखि कुनै पनि पुर्नस्थापनाले यस्तो अचम्मको परिणाम कहिल्यै ल्याएको छैन भनेर भनिन्छ।

छ. योना अझै पनि दुखी छन्। (योना 4:2)

हामी कथाको अन्त्यतिर र्छौं। योना खुसी छैनन्। उनी सुरुमा निनवे आउन चाहँदैनथे। उनी यी फोहोरी मूर्तिपूजकहरूलाई प्रचार गर्न चाहँदैनथे। उनले बाटोभरि परमेश्वरसँग लडे। योनाको लागि एक मात्र सान्त्वना यो थियो कि निनवेले उनको प्रचारलाई अस्वीकार गरेपछि, उनी परमेश्वरले शहरलाई नष्ट गरेको हेर्न आनन्द लिन सक्थे। उनले चाहेको अन्तिम कुरा भनेको परमेश्वर "नरम" भएको र निनवेलाई नष्ट हुने हुकबाट छुटेको देख्नु थिएन।

योना ४:२ सम्पूर्ण पुस्तकको मुटु हो: 'अनि तिनले परमप्रभुलाई यसो भनेर प्रार्थना गरे, “हे परमप्रभु, म आफ्‍नो घरमा छँदै के मैले यही कुरा भनेको थिइनँ र? यसैकारणले त तर्शीशमा भागेर जान मैले आतुरी गरेको थिएँ। तपाईं अनुग्रहकारी र करुणामय, रीस गर्नमा धैर्यवान्, दयामा प्रशस्‍त, र दु:ख दिनुमा बेखुशी हुनुहुने परमेश्‍वर हुनुहुन्‍छ भनी मैले जानेको थिएँ। ' (योना 4:2)

सारमा उनी भन्छन्, "मलाई थाहा थियो कि तपाईंले यस्तो केही गर्नुहुनेछ।"र बचाउनुहुनेछ। हामी यसलाई धेरै सरल रूपमा यसरी भन्न सक्छौं होला:

परमेश्वर निनवेलाई बचाउन चाहनुहुन्थ्यो।

योना यसलाई नष्ट गर्न चाहन्थे।।

योना निनवेलाई नरकमा गएको हेर्न चाहन्थे। तिनीहरू यसको योग्य थिए र उनी यो भएको हेर्न त्यहाँ उपस्थित हुन चाहन्थे। अब योना परमेश्वरसँग रिसाएका छन् किनभने उहाँले सबै कुरा बिर्सनुभएको छ।

ज. परमेश्वर अझै पनि निनवेलाई माया गर्नुहुन्छ! (योना 4:11)

यो पक्कै पनि पुस्तकको महान बुँदा हो। अन्तिम पदमा परमेश्वरले योनालाई एउटा प्रश्न सोध्नुभयो—एउटा प्रश्न जसको उत्तर छैन र वास्तवमा, आज पनि जवाफको लागि माग गर्दछ: "के म त्यो महान शहरको बारेमा म चिन्तित नहुनु?" 'तर निनवे सहरमा एक लाख बीस हजारभन्‍दा बढ्‌ता मानिसहरू छन्, जसले दाहिने र देब्रे हातै चिन्‍न सक्‍दैनन्, र त्‍यसमा धेरै गाईबस्‍तुहरू पनि छन्‌। के मैले त्‍यस ठूलो सहरको निम्‍ति फिक्री नगरूँ?”' (योना 4:11)

यसपछि हामी योनाबाट अरु केही सुन्दैनौं—जसले हामीलाई सोच्न बाध्य पार्छ कि उसले परमेश्वरबाट अरु सन्देश पायो कि पाएन होला। यो कथा बाइबलमा भएको अरु कथाहरु मध्येको रोचक कथा हो किनभने यसले हामी सबैलाई भन्छ जो संसारका मानिसहरुलाई परमेश्वरको सन्देश सुनाउन चाहँदैनन्।

हामी आरामदायी, सजिलो जीवन जीउन चाहन्छौं र चर्चको चार भित्ता भित्र यसलाई राम्रो र उत्कृष्ट राख्न चाहन्छौं।

योनाको यो सम्पूर्ण कुरालाई हेर्दा: योनाका दुई समस्याहरू छन्। उनको समस्या यो हो कि उनको निनवेका मानिसहरूको लागि कुनै हृदय छैन। तर उनको वास्तविक समस्या गहिरो छ: उनीसँग परमेश्वरको लागि कुनै ठाउँ छैन। योनाको वास्तविक समस्या परमेश्वर हो!!! उनको लागि परमेश्वर धेरै सानो हुनुहुन्छ र त्यसैले परमेश्वरको लागि उनको हृदय धेरै सानो भएको छ।

अन्तिम टिप्पणी। यो रोचक छ, होइन र? परमेश्वरको सबैभन्दा ठूलो समस्या निनवेका दुष्ट मानिसहरू होइन। ओह, तिनीहरू साँच्चै दुष्ट थिए - यसमा कुनै शंका छैन। तर परमेश्वरलाई तिनीहरूसँग कुनै समस्या छैन।

परमेश्वरको सबैभन्दा ठूलो समस्या उहाँको अनिच्छुक, विद्रोही अगमवक्ता थियो।।

परमेश्वरको सबैभन्दा ठूलो समस्या त्यहाँको पापी मानिसहरु होइन। उहाँको सबैभन्दा ठूलो समस्या उहाँको अटेरी अगमवक्ता हो।

हामी स्वीकार गर्न चाहने र परमेश्वरको आज्ञापालन गर्ने भन्दा धेरै योना जस्तै भाग्ने छौं। त्यसैले हामी हाँस्छौं र त्यसपछि हामी चिच्याउछौं। हामीमध्ये धेरैजना भित्र धेरै योनाका स्वरुपहरु छन्।

 

II. यस कथाबाट हामीलाई पाठ

हामी यो कथाबाट चार कुराहहरू सिक्न सक्छौ।

क. परमेश्वरले अझै पनि निनवेलाई माया गर्नुहुन्छ!

आज निनवे कहाँ छ? निनवे दरैगाँउ हो। निनवे तपाईंको परिवार हो। निनवे तपाईंको छिमेक, गोर्खा हो।

निनवे त्यो ठाउँ हो जहाँ संसारका मानिसहरू छन्। जुनसुकै ठाउँ हुन सक्छ। निनवे केवल एक ठाउँ मात्र होइन। निनवे संसारका मानिसहरूको भेलाको प्रतीक हो। जहाँ तपाईंले मानिसहरू भेट्टाउनुहुन्छ, त्यहाँ तपाईंले निनवेलाई यसको सबै वैभव र शक्ति र महिमा, लोभ, क्रूरता र दुष्टतामा भेट्टाउनुहुन्छ। यो सबै त्यहाँ छ, एकसाथ मिश्रित, खराबसँग राम्रो, अन्धकारसँग उज्यालो।

वरपर हेर्नुहोस्, परमेश्वरको सन्तान! तपाईं निनवेमा बस्नुहुन्छ, तपाईं निनवेमा काम गर्नुहुन्छ, तपाईंको सम्पूर्ण जीवन "त्यो महान शहर" भित्र र वरिपरि बिताइएको छ। कोही पनि यसबाट उम्कन सक्दैन।।

र सन्देश स्पष्ट छ: परमेश्वर अझै पनि निनवेलाई माया गर्नुहुन्छ! उहाँ अझै पनि तपाईंको छिमेकलाई माया गर्नुहुन्छ। उहाँ अझै पनि दरै गाउँलाई माया गर्नुहुन्छ। उहाँ अझै पनि दरैगाँउमा आफ्नो जीवन बिताउने मानिसहरूलाई माया गर्नुहुन्छ। उहाँ बुट्टारमा बस्ने मानिसहरूलाई माया गर्नुहुन्छ।

कहिलेकाहीं हामी केवल दुष्ट देख्छौं र सोच्दछौं, "परमेश्वरले यो शहरलाई घृणा गर्नुपर्छ।" होइन, परमेश्वरले यो शहर र यी मानिसहरूलाई माया गर्नुहुन्छ। तिनीहरूले गर्न सक्ने कुनै पनि कुराले उहाँलाई माया गर्नबाट रोक्न सक्दैन। उहाँ सबै पाप देख्नुहुन्छ - सानो भन्दा सानो कुरा पनि उहाँको दृष्टिबाट उम्कन सक्दैन - तर यदि कोही फर्किन्छ भने उहाँ त्यसलाई माया गर्नुहुन्छ।

परमेश्वरले अझै पनि निनवेलाई माया गर्नुहुन्छ!

ख. परमेश्वर अझै पनि आफ्ना सन्तानहरू निनवे गएको चाहनुहुन्छ।

उहाँको हृदय कहिल्यै परिवर्तन भएको छैन। परमेश्वरले हाम्रो देशका ठाउँहरूलाई माया गर्न कहिल्यै छोड्नुभएको छैन:

गोर्खा

काठमाडौं

पोखरा

चितवन

दरैगाँउ

बुट्टार

तपाईंको छिमेक।

परमेश्वर अझै पनि यिनीहरुलाई माया गर्नुहुन्छ किनभने त्यहाँ मानिसहरू छन्। २० औं शताब्दीको अन्त्यमा तपाईंले मानिसहरुलाई कहाँ भेट्टाउनुहुनेछ? तपाईंले तिनीहरूलाई संसारका ठुला शहरहरूमा भेला भएको पाउनुहुनेछ। तर जहाँ मानिसहरू भेला हुन्छन्, तपाईंले अपराध, लागूपदार्थ, वेश्यावृत्ति, घृणा, वर्गयुद्ध, लोभ, हत्या, टुटेको जीवन, टुटेको घर, टुटेको सपना पनि भेट्टाउनुहुनेछ।

त्यसैले परमेश्वरका सन्तानहरू मानिसहरुको बीचमा जानुपर्छ: मानिसहरूलाई त्यहाँ हाम्रो आवश्यकता छ र परमेश्वरले हामीलाई त्यहाँ गएको चाहनुहुन्छ!

ग. परमेश्वर अझै पनि तपाईंलाई निनवे पुर्‍याउन जे पनि गर्न इच्छुक हुनुहुन्छ!

योनाले एउटा ठूलो माछाको पेटमा तीन दिन र तीन रात बिताए। तपाईंलाई उहाँको आज्ञापालन गर्नको लागि परमेश्वरले के गर्नुपर्नेछ? हाम्रा चर्चहरू आधुनिक समयका योनाहरूले भरिएका छन् जसले तर्शीशमा जाने जहाज पनि भेट्टाएका छन्। हुनसक्छ तपाईं तिनीहरूमध्ये एक हुनुहुन्छ। हुनसक्छ परमेश्वरले तपाईंसँग कुरा गर्नुभएको छ र तपाईंले भन्नुभएको छ, "परमेश्वर, मलाई लाग्दैन कि म त्यो गर्न सक्छु।" यदि त्यसो हो भने, मसँग तपाईंको लागि राम्रो समाचार र नराम्रो समाचार छ: राम्रो समाचार यो हो: त्यो ठूलो आँधीको बारेमा चिन्ता नगर्नुहोस्। नराम्रो समाचार यो हो: तपाईंले त्यो ठूलो माछाको बारेमा चिन्ता गर्न थाल्नु राम्रो हुन्छ!

"उहाँले तपाईंलाई तपाईंको आफ्नो इच्छा विरुद्ध जान लगाउनुहुन्न, उहाँले तपाईंलाई जान इच्छुक बनाउनुहुन्छ"। परमेश्वरले तपाईंलाई निनवे जान जबरजस्ती गर्नुहुन्न। तर उहाँले तपाईंको जीवनलाई दुःखदायी बनाउनुहुनेछ जबसम्म तपाईं आफैं जाने निर्णय गर्नुहुन्न। उहाँले तपाईंलाई जान इच्छुक बनाउनुहुन्छ।

घ. निनवेलाई तपाईंको आवश्यकता छ।

सबै क्रूरता र पापको बावजुद, निनवे परमेश्वरतिर फर्कन तयार थियो। । मानिसहरूलाई यो थाहा थिएन, तिनीहरू सचेत रूपमा आफ्नो आवश्यकताको बारेमा सचेत थिएनन्, तिनीहरू कुनै पनि अर्थमा परमेश्वरलाई खोजिरहेका थिएनन्। तर सबै कुरा देख्ने परमेश्वरलाई थाहा थियो कि यो घिनलाग्दो शहर उहाँतिर फर्कन तयार छ। तर परमेश्वरले एकजना खोज्दै हुनुहुन्थ्यो जसले निनवेमा गएर प्रचार गरोस् भन्ने चाहनुहुथ्यो। त्यो व्यक्ति योना थियो।

योना निनवेको लागि परमेश्वरको मानिस थिए!

आज संसार निनवेले भरिएको छ ... र परमेश्वर अझै पनि त्यहाँ जानको लागि कसैलाई खोज्दै हुनुहुन्छ।

निनवे शहर हो।

यो संसारका सबै ठूला शहरहरूको लागि पनि खडा छ।

तर निनवे त्यो भन्दा पनि व्यक्तिगत छ। यसको अर्थ ...

त्यो ठाउँ तपाईं मात्र जान सक्नुहुन्छ।

त्यो व्यक्ति तपाईं हुनुहुन्छ जो पुग्न सक्नुहुन्छ।

त्यो अवसर तपाईंले मात्र पाउन सक्नुहुन्छ।

तपाईंको जीवनमा अहिले निनवे छ। यो तपाईं सँग काम गर्ने साथी हुन सक्छ। यो त्यो समूह हुन सक्छ जुन तपाईंसँग स्कूल र कलेजमा पढ्नुहुन्छ। यो तपाईंको छिमेकीहरू हुन सक्छन्, वा यो दरैगाँउ विनय चर्चको लागि दरै गाउँका मानिसहरु हुन सक्छन्। कसलाई थाहा छ? तपाईंको निनवे तपाईंको पति वा पत्नी वा तपाईंका हुर्केका छोराछोरीहरू पनि हुन सक्छन्। तपाईंको निनवे नयाँ शहरमा नयाँ जागिर वा नयाँ घर हुन सक्छ। निनवे अन्ततः त्यो ठाउँ हो। जहाँ तपाईं परमेश्वरको इच्छाको लागि खडा हुन सामना गर्न डराउनुहुन्छ। खेल अंकल र तृष्णा अन्टीको लागि निनवे उहाँको ससुरा बुवा हुन सक्नुहुन्छ। सम्झना अन्टीको लागि उहाँको छोरा-बुहारी हुन सक्छ।

जहाँ तपाईं जान डराउनुहुन्छ ... तर परमेश्वरले तपाईंलाई त्यहाँ पठाउन चाहनुहुन्छ।

तपाईं बोल्न डराउनुहुन्छ ... तर त्यहाँ मानिसहरू छन् जसले तपाईंले भन्नु भएको कुरा सुन्न आवश्यक छ।

तपाईं कदम चाल्न डराउनुहुन्छ ... तर परमेश्वर भन्नुहुन्छ, "मलाई विश्वास गर।"

निनवेले आज तपाईंलाई बोलाइरहेको छ ...

तपाईं यसको बारेमा के सोच्दैहुन्छ?

परमेश्वरले तपाईंलाई निनवेमा चाहनुहुन्छ ...

तर तपाईं जान चाहनुहुन्न।

तपाईं बरु तर्शीश जान चाहनुहुन्छ ...

ठीक छ, तर त्यो ठूलो माछाको लागि तयार हुनुहोस्।

संसार दुष्ट र भ्रष्ट छ ...

के तपाईं जे भए पनि बोल्नुहुनेछ?

मानिसहरू क्रूर छन् ...

के तपाई तिनीहरूलाई परमेश्वरको प्रेमको बारेमा बताउनुहुन्छ?

हामी भन्छौ, "म जान चाहन्न।"

 

परमेश्वर भन्नुहुन्छ, "ठीक छ, म तिमीलाई जान इच्छुक बनाउनेछु।"